Haqqımızda
Azərbaycan Respublikasının Prezidenti cənab İlham Əliyevin 2013-cü ildə təsdiq etdiyi “Azərbaycan Respublikasında Təhsilin inkişafı üzrə Dövlət Strategiyası” ölkəmizdə təhsilin uzunmüddətli hədəflərini müəyyənləşdirmişdir. Bu hədəflərə çatmaq üçün tərtib olunmuş fəaliyyət planında (2015) təhsilin keyfiyyətinin təminatı sistemlərinin modernləşdirilməsi (3.3) önəmli məsələ olaraq qarşıya qoyulmuşdur. Bu baxımdan, ölkə başçısının 29.12.2019-cu il tarixli 907 nömrəli fərmanı ilə Azərbaycan Respublikası Elm və Təhsil Nazirliyinin tabeliyində təhsilin keyfiyyətinin müstəqil qiymətləndirilməsi sahəsində peşəkar və ixtisaslaşmış qurum olan Təhsildə Keyfiyyət Təminatı Agentliyi (TKTA) yaradılmışdır.
TKTA-nin fəaliyyət istiqamətlərindən biri də ümumi təhsil məktəblərində keyfiyyət monitorinqini həyata keçirməkdir. TKTA tərəfindən ümumi təhsil məktəblərində aparılan keyfiyyət monitorinqinin məqsədi təhsilin keyfiyyətini düzgün dəyərləndirməkdir. Bu məqsəd aşağıdakı fəaliyyət istiqamətlərini əhatə edir:
| Məktəblərin inkişafını təşviq etmək |
| Məktəblərin güclü və inkişafa ehtiyacı olan tərəflərini aşkar etmək |
| Məktəb rəhbərlərinə məktəblərində təhsilin keyfiyyətini anlamağa yardım etmək |
| Məktəb rəhbərlərinə məktəblərini necə inkişaf etdirməli olduqlarını anlamağa yardım etmək |
| Məktəblərin özünüqiymətləndirmə aparmasını təşviq etmək, həmçinin özünüqiymətləndirmənin nəticələrinin obyektivliyini yoxlamaq |
| Məktəblərin effektiv inkişaf planı hazırlamasını təşviq etmək |
| "TKTA Məktəblərin keyfiyyət monitorinqi çərçivəsi"ndə öz əksini tapmış 4 sahə üzrə məktəb fəaliyyətinin keyfiyyətinin ətraflı dəyərləndirilməsini apararaq hesabat hazırlamaq |